TEJO | Tutmonda Esperantista Junulara Organizo

Novembro 2010

Dum la kunveno de la Estraro en Roterdamo preciziĝis la planoj pri la 2011a papera eldono de Pasporta Servo, ĝia kompilinto Derk Ederveen iĝis honora membro de TEJO kaj oni lanĉis la retejon de Kontakto.

De la 29-a de oktobro ĝis la 1-a de novembro dum longa halovina semajnfino en la Centra Oficejo en Roterdamo kunvenis la Estraro de TEJO.

Kvankam unu estrarano (Irmina Szustak) ne povis veni de Brazilo, la kunveno estis plenhoma pro la gastoj kiuj venis: Aleks Baudry, Adenjo Charrière kaj Tina Tišljar.
Ankaŭ estis tri skajpkunvenoj kun Michael Boris Mandirola (aktivulo pri KER), Rogener Pavinski, (redaktoro de Kontakto) kaj Nicola Ruggiero (redaktoro de Tejo Tutmonde).

Kontakto & TT
Lanĉiĝis dum la kunveno la nova retejo de la revuo Kontakto: kontakto.tejo.org. Per ĝi eblas facile kontribui artikolojn, kaj sekvi la fluon de novaĵoj. Venontjare ekefikos la nova koncepto de Kontakto sub la redaktado de Rogener Pavinski el Brazilo, laŭ kiu TEJO Tutmonde iĝos rubriko “Kontakto-Movade” en Kontakto anstataŭ memstara eldonaĵo. Tiun rubrikon gvidos la nuna redaktisto de TT, Nicola Ruggiero el Italio/Islando, kiu ankaŭ redaktos la retejon.

Pasporta Servo
Decidiĝis ankaŭ la planoj pri la eldono de Pasporta Servo en 2011. Oni elprenos datumojn pri gastigantoj el la retejo kaj paperaj aliĝiloj state je 15-a de decembro, kaj post prilaborado kaj enpaĝigo la libro laŭ la plano aperos ĉirkau aprilo de 2011. Nuna ĉefrespondeculo de Pasporta Servo estas Alexandre Baudry el Francio, eksvolontulo de TEJO kiu jam pasintjare valore kontribuis al la kompilado de la pasportserva libro.

IJK

La LKK de la Ukrainia IJK en 2011 informis ke oni ŝanĝis lokon, tiel ke la kongreso okazos en Kijivo/Kievo mem, anstataŭ en antaŭurbo.

La Estraro daŭre atendas kandidatiĝojn de landaj sekcioj por IJK 2012.

UEA

Kiel kutime okazis sesio kun Osmo Buller kaj Loes Demmendaal. Inter alie, Marek Blahuŝ estis aprobita kiel komitatano A de TEJO ĉe UEA.

Junuloj

Okazis ankaŭ kunveno kie oni pridiskutis la temon de junuloj sub 18 kiuj ofte "perdiĝas" el la movado, ĉar ili ne havas lokon kien iri kaj la IIK ne tute taŭgas kaj havas alian celgrupon. La kunveno okazis kun Adenjo Charrière kaj Tina Tišljar kiuj venis speciale por pridiskuti la temon. La estraro aprobis la ideon starigi komisionon pri "adoleskula agado", sub la gvido de Adenjo.

Kontribuantoj

En la retejo tejo.org baldaŭ aperos sekcio, en kiu troveblos informoj pri konkretaj projektoj kiuj serĉas kunlaborantojn. Ĉi tiel ni intencas plifaciligi al aktivemuloj la eblecojn kontribui al la agado de TEJO.

Cetere

Krome okazis sesioj pri strategiaj planoj de KER; la retejo tejo.org,
Derk Ederveen, la kompilinto de Pasporto Servo, laŭ la decido de la Komitato de TEJO de la KK en Liberec , iĝis honora membro de TEJO.