Esti redaktoro signifas ne nur grave kontribui al la bonfarto de TEJO, sed ankaŭ samtempe persone kaj movade pliriĉiĝi. Atendas vin memstara laboro kaj la eblo realigi viajn kreemajn ideojn. La redaktado okazas per interreto (laŭ la preferataj rimedoj de la dungito), do homoj el ĉiuj landoj povas kandidatiĝi.
1. Postena priskribo
La laboro de la Redaktoro estas
- krei la vizion por la revuo Kontakto;
- superrigardi la produktadon de ses numeroj jare;
- verki artikolojn;
- aktive serĉi homojn por verki artikolojn kaj ilin redakti (t.e.: legi ilin kiam ricevite, proponi ŝanĝojn, decidi ĉu la artikoloj taŭgas aŭ ne por la revuo, ktp.);
- kontakto kun la eldonejo, la provlegistoj kaj la respondecaj stabanoj de TEJO kaj UEA;
- superrigardo pri enpaĝigo kaj grafikaĵoj, kontakto kun grafikisto.
Por kandidatiĝi, vi devas
- havi sperton rilate al redaktado de tekstoj kaj kreado de kohera enhavo; ideale ankaŭ sperton pri ĵurnalismo;
- esti sperta Esperantisto, kiu jam bone konas la movadon;
- kapabli lerte uzi komputilon por plenumi la koncernajn taskojn;
- kapabli lerte labori sen proksima superrigardo;
- interesiĝi pri informado, kulturo kaj tutmondaj novaĵoj en kaj ekster Esperantujo;
- kapabli kunlabori kaj komuniki en internacia teamo kun malsimilaj horzonoj.
Noto: La kandidato ne bezonas pruvi laborpermeson/loĝlokon en Eŭropa Unio. TEJO stimulas kandidatiĝojn de ĉiuj, sen ajna diskriminacio surbaze de raso, haŭtkoloro, religio, sekso, genro, seksorientiĝo, etno, aĝo, handikapo, ktp.
Detaloj:
- Laborhoroj: varie laŭ la eldono kaj la propra laborritmo de la Redaktoro.
- Honorario: po 550 EUR por numero
- Loko: rete
- Ekofico: julio 2025
2. Kandidatiĝo
Se vi interesiĝas, sendu vivresumon kaj motiviĝleteron al oficejo@tejo.org aŭ kandidatigxoj@tejo.org ĝis la 15-a de junio 2025. La motiviĝletero enhavu:
- prezenton de plano (respondu al la demandoj: Kiel vi imagas la revuon? Kiajn planojn vi havas por ĝi? Kiajn novajn enhavojn vi proponas?)
- prezenton de kvar diversaj temoj kaj konceptoj por ke oni komprenu, kiaj estas viaj interesoj kaj vizioj por la revuo.
3. Elekta procezo
Elektitaj kandidatoj estos invititaj al dua fazo, konsistante el intervjuo kun TEJO-teamo. En la semajnoj post la intervjuo, ni kontaktos vin por informi pri la rezulto de la kandidatiĝo. La nova Redaktoro devas preti labori ekde julio 2025 (oni interkonsentos pri preciza dato).
4. Ceteraĵoj
Se vi trovas la eblon interesa kaj se vi ŝatus kunagadi por TEJO kaj redakti Kontakto, sendu vian kandidatiĝon al oficejo@tejo.org aŭ
kandidatigxoj@tejo.org.
Kaze de aldonaj demandoj kaj/aŭ komentoj pri la posteno, ne hezitu kontakti nin.