TEJO kaj Tutmondaj Voĉoj (Global Voices Esperanto) kunigas fortojn por volontula kunlabora projekto pri tradukado de artikoloj pritemantaj genron. La celo estas krei skipon de tradukantoj kaj provlegantoj por publikigi en Esperanto novaĵojn de la civitana gazeto Tutmondaj Voĉoj.
Kreita en 2004, kun esperantlingva sekcio ekde 2013, Tutmondaj Voĉoj estas plurlingva retejo kaj komunumo kiu havas la mision kolekti rakontojn de marĝenitaj kaj subreprezentitaj komunumoj pri diversaj aktualaj temoj.
Kadre de tiu ĉi kunlabora projekto, ni invitas vin aliĝi kiel tradukanto aŭ provleganto por disvastigi artikolojn el la tuta mondo kun fokuso pri genra egaleco kaj diverseco. La tradukitaj artikoloj estos publikigitaj en la retejoj de TEJO kaj de Tutmondaj Voĉoj, kaj helpos al videbligo kaj instigado al diskutoj pri tiuj temoj.
Aliĝante al nia teamo, vi iĝos membro de reputacia internacia gazeto kaj ĝuos propran profilon ĉe nia paĝo, kun via nomo kaj foto apud la esperantigitaj artikoloj. Vi gajnos sperton, plibonigos vian lingvan nivelon kaj lernos pri genraj perspektivoj en diversaj partoj de la mondo.
Krome ni donacos al vi nian specialan paĝindikilon kun semoj de la “neforgesumin”-floro miozoto, por ke Tutmondaj Voĉoj kresku pli!
Vizitu la retejon de Tutmondaj Voĉoj por aliĝi, aŭ kontaktu nin ĉe info@tejo.org kaj esperanto@globalvoices.org.