Tutmonda Esperantista Junulara Organizo (TEJO), kunlabore kun Konsilio de Eŭropo (KdE) kaj la Kipra Junulara Konsilio (CYC) organizas internacian seminarion nomatan “Junuloj por Eŭropo: Trejnigante la morgaŭajn packonstruantojn per enrigardoj en la pasintecon” en Pervolia kaj Nikosio, Kipro. En la seminario partoprenos 20 junuloj loĝantaj en la 46 membroŝtatoj de Konsilio de Eŭropo, kiuj diskutos kaj lernos pri temoj rilate al interkulturaj dialogoj kaj konfliktransformado. Pere de la seminario, kreota danke al la faciliganta teamo, la partoprenantoj havos la eblon:
- Kreskigi sian konscion pri la graveco koncerne al interkulturaj dialogoj kaj konfliktransformado per edukado pri homaj rajtoj;
- Enkondukigi la konceptojn de edukado pri Homaj Rajtoj, rajtbazita aliro kaj neformalaj edukadaj metodologioj por junuloj kiuj ne havis antaŭajn konojn pri ili;
- Interŝanĝi opiniojn, sciojn, kapablojn kaj bonajn praktikojn, certigante reciprokan lernadon inter la ĉeestantaj junuloj, kaj konante la socipolitikan situacion de la insulo per sia junularo;
- Kunplani kaj realigi porkonsciigan videon pri interkulturaj dialogoj el la Kipra socipolitika kunteksto per la kunlaborado kun kipraj junuloj;
- Instigi la partoprenontajn junulojn iĝi multoblantoj, tiel ke post la fino de la aranĝo, ili disvastigos la rezultojn en siaj lokaj komunumoj.
La seminario okazos de mardo, la 25-an de Novembro (alventago), ĝis lundo, la 1-an de Decembro (forirtago). La labortagoj de la seminario estas de la 26-a ĝis la 30-a de Novembro 2025. La faciligantoj kaj partoprenontoj dum la seminariaj datoj loĝos en Pervolia, Kipro.
Kiajn kandidatojn ni serĉas?
La 2 serĉataj faciligantoj devas plenumi la jenajn kondiĉojn:
- Loĝi en unu el la 46 membroŝtatoj de KdE;
- Preti aktive kunlabori por la sukcesa kunrealigo de la seminario dum la periodo antaŭ, dum kaj post la efektivigo de la seminario;
- Havi la kapablon labori plene kaj en Esperanto kaj en la angla;
- Havi konon kaj sperton pri interkulturaj dialogoj kaj konfliktransformado, kaj ni valoros konojn pri komunikado kaj videofilmado;
- Sperti pri neformala edukado, prefere pri la menciita temo de la trejnado.
Kiajn taskojn havos la trejnistoj?
- Preparos la enhavon de la seminario kune kun la TEJO-projektmastrumisto de la projekto;
- Planos kaj preparos iujn ajn materialojn kiujn ili bezonos por plenumi la seminarion;
- Liveros la sesiojn dum la labortagoj de la seminario (po 6-6,5 horoj da trejnado tage dum 3 tagoj distribuotaj inter la trejnistoj kaj aldonan tagon kun la kontribuo de aldona eksterna faciliganto) kune kun la TEJO-projektmastrumisto;
- Liveros raporton pri la kunsidoj de la seminario al la TEJO-projektmastrumisto, post la fino de la seminario, por ĝeneralaj raportaj celoj.
Kion la akceptataj faciligantoj ricevos?
- Kompletajn repagojn de la alven- kaj reven-vojaĝkostoj al Pervolia kaj provizadon de surlokaj vivnecesoj (manĝoj, loĝado kaj aldonaj transportoj), pere de TEJO danke al subvencia subteno de KdE;
- Honorarion de 525€ por la provizitaj servoj, post la livero de la raporto de la seminario;
- Senpagan tranokton en Pervolia dum ĉiu necesa restado surloke;
- Eblon partoprenadi kaj kontribuadi al la organizado de seminario en internacia kunlaborado kune kun la Kipra Junulara Konsilio;
- Spertiĝon pri neformala edukado, eŭropa agado kaj similaj fierindaĵoj por via vivresumo; TEJO provizos atestilon pri la liverado de la trejnado al la faciligantoj.
Vi povas kandidatiĝi* esprimante vian motivon faciligi la seminarion kaj sendante vian vivresumon (en la angla lingvo, ĉar KdE-respondeculoj valoros kaj rezolucios pri viaj kapabloj kunfaciligi la seminarion) plenigante la jenan formularon antaŭ la limdato de lundo la 22-a de Septembro 2025. Vi ankaŭ povas retpoŝti al david.ruiz.sanchez@tejo.org por ricevi pli da informoj.
* Konforme al la politiko de la Komisiono pri Aktivula Trejnado (AT) de TEJO, ni speciale instigas kandidatiĝojn de personoj, kiuj realigis ian Trejnadon por Novaj Trejnistoj aŭ/kaj oficiale estas en la teamo de TEJO-Trejnistoj aŭ/kaj havas sperton pri ne-formalaj metodologioj pri edukado.
Aldone, kaj al KdE kaj al TEJO gravas diverseco kaj provizi egalajn ŝancojn. Ni aparte instigas la kandidatiĝon de ĉiuj eblaj kandidatoj plenumantaj la kondiĉojn, sendepende de genro aŭ handikapeco. En tiu lasta kazo, bv. priskribi kiel via handikapo povas estigi specialajn bezonojn, kaj ni strebos trovi solvon por vi.