Ni ĝojas prezenti al vi volontulon de TEJO, Franĉeskon!

Rakontu iom pri vi! El kiu lando vi estas, kiom vi aĝas…?

Mi estas Franĉesko Ĝuljano, el Italio, proksime al Milano, kaj mi estas 24-jara.

Kion vi faras en via eksteresperantuja vivo, rilate al studoj, laboro? Kiuj estas viaj ŝatokupoj?

Antaŭ ol fariĝi TEJO-volontulo, mi laboris kiel esploristo pri politika historio ĉe la Universitato de Pavio kaj ĉe la Universitato de Varsovio. Mi studis internaciajn rilatojn dum mia bakalaŭra studperiodo, kaj poste dum mia magistra studado mi okupiĝis pri afrik-aziaj studoj ĉe la Universitato de Pavio. El tio naskiĝis mia granda intereso pri politika historio kaj internaciaj dinamikoj.

Miaj ŝatokupoj estas multaj! Mi amas muzikon: mi ne nur aŭskultas, sed ankaŭ produktas propran muzikon kaj ofte pasigas horojn serĉante novajn sonojn aŭ kreante novajn muziklistojn. Mi ankaŭ ludas videoludojn, kion mi faras ekde kiam mi estis infano, kaj lastatempe mi ekŝatas pentri miniaturojn — tre trankviliga kaj kreema maniero pasigi la tempon. Mi ankaŭ amas sportumi kaj trejniĝi, kaj ĉiutage mi praktikas meditadon.

Kial vi decidis iĝi TEJO-volontulo?

Post kiam mia kontrakto en Varsovio finiĝis, mi komencis serĉi novan sperton ekster Italio. Mi volis eltrovi la vivon en internacia medio kaj lerni labori kun homoj el la tuta mondo. Dum interparolo kun amiko, li menciis TEJO-n kaj ĝian volontulan programon — kaj tuj mi sentis, ke tio estus perfekta eblo por mi: lerni labori en nova medio, kun homoj de mia aĝo, kaj samtempe plilarĝigi miajn horizontojn. Mi ne kaŝas, ke ankaŭ la ebleco vojaĝi kaj malkovri novajn lokojn estis tre alloga! Tiaj ŝancoj ne aperas ĉiutage, do mi volis profiti ĝin plene.

Pri kio vi okupiĝos pleje en la Centra Oficejo? Kion vi volas fari por TEJO?

Ĉar mi estas ankoraŭ komence de mia volontulado, mi iom post iom lernas kiel funkcias ĉio ĉi. En la venontaj monatoj mi volas partopreni en la ekstera rilatado de TEJO, helpi ĉe eventoj kaj ankaŭ kontribui al la sociaj retoj de la organizo. Mi ŝatus samtempe lerni pli pri la interna flanko, aparte la financa kaj administra laboro, ĉar mi volas kompreni pli profunde kiel funkcias la asocio en sia tuto.

Kion vi ŝatus lerni, sperti kaj atingi dum via volontulado?

Unue, mi volas fariĝi vere flua en Esperanto! Krome, mi volas uzi ĉi tiun jaron por plene eniri en Esperantujon, kiu jam nun tre fascinas min. Mi esperas renkonti multajn malsamajn homojn kaj krei amikojn kaj ligojn, kiuj daŭros ankaŭ post la jaro en Roterdamo. Kompreneble, mi volas ankaŭ profesie kreski, lerni novajn kapablojn, provi malsamajn rolojn — de organizado ĝis vojaĝoj — kaj trovi mian lokon en tiu multkultura medio.

Ĉu tiu ĉi estas via unua sperto en Esperantujo? Aŭ ĉu vi jam havis spertojn en la Esperanto-movado? Se jes, rakontu iomete pri viaj ĝisnunaj aktivaĵoj!

Jes, TEJO estas mia unua vera sperto en Esperantujo, sed ne la unua fojo, kiam mi aŭdis pri ĝi. Mi jam konis kelkajn amikojn, kiuj estis aktive engaĝitaj en la movado, kaj iliaj rakontoj inspiris min lerni la lingvon mem.

Kion signifas por vi Esperanto? Kion signifas por vi esti esperantisto?

Tio estas malfacila demando! Mi lernas Esperanton ekde nur kelkaj monatoj, do mi ankoraŭ ne havas kompletan respondon. Sed mi povas diri, ke Esperanto venis en tre ĝusta momento: en periodo de transiro inter miaj studoj, laboro kaj persona kresko. Ĝi donis al mi senton de komunumo kaj novajn eblojn, pri kiuj mi antaŭe eĉ ne sciis. Se vi demandos min denove post unu jaro, mi certe havos eĉ pli profundan respondon!

Kiaj estas viaj ĝisnunaj impresoj pri la TEJO-laboro, la Centra Oficejo ĝenerale, viaj kolegoj, la vivo en Roterdamo…?

Kvankam mi ankoraŭ ne havis tempon formi kompletan bildon pri la laboro, mi jam nun povas diri, ke mi estas ege feliĉa pri la etoso. La domo, la urbo kaj miaj kolegoj helpas min multe por senti min hejme post tiel mallonga tempo. Mi tre ŝatas la senton de komunumo kaj la amikecan etoson inter mi, Kjara, Konrad’ kaj Gabrjelo. Roterdamo mem fascinas min pro sia internacia kaj kultura naturo – estas tiom multe por fari kaj malkovri, ke mi sentas min en la ĝusta loko!

Ĉu vi havas vivdevizon?

Kun malmulte da akvo, la anaso ne flosas.